අනුර කියු බොරුවලට,නීතිමය පියවර ගන්නවා

ඇමරිකා එක්සත් ජනපද සී.අයි.ඒ නියෝජිතයෙකු වන ඉමාද් සුබේරි නමැත්තාට ඇමරිකානු ඩොලර් මිලියන 6.5 ක මුදලක් නිසි අනුමැතියකින් තොරව  2014 වර්ෂයේ දී ගෙවා ඇති බවට ජනතා විමුක්ති පෙරමුණේ නායක අනුර කුමාර දිසානායක මහතා  නගන චෝදනාව තරයේ ප්‍රතික්ෂේප කරන බව මහ බැංකුවේ හිටපු අධිපති අජිත් නිවාඩ් කබ්රාල් මහතා පැවසීය

රජයේ ලිඛිත  නිල උපදෙස්  සහ  බලධාරීන්ගේ අනුමැතිය මත එම ගෙවීම් සිදුකර ඇති බවත්  ඇමරිකානු ඩොලර් මිලියන 6.5 ක මුදලක්  එම තැනැත්තාට සහ අදාල සමාගම්වලට ගෙවීමේදී ශ්‍රී ලංකා මහ බැංකුව කිසිදු පටිපාටිමය හෝ වෙනත් නීති රීති උල්ලංඝනයක්
කර  නැති බවත් මහ බැංකු හිටපු අධිපති වරයා කීවේය.

මේ ගෙවීම් තනි පුද්ගලයකුගේ අභිමතය අනුව කළ දෙයක් නොවන බවත් ඇමරිකා එක්සත් ජනපදයේ කරන ලද විවිධ ප්‍රවර්ධන වැඩසටහන් වෙනුවෙන් එවකට රජය විසින් කරන ලද ගෙවීම්ද  මෙයට ඇතුළත් වන බවත් ඔහු කීවේය.

දේශපාලන අරමුණු සහිත ඇතැම් කණ්ඩායම් තමාගේ කීර්තිනාමය හානි කිරීමේ අරමුණෙන් මෙම අසත්‍ය ප්‍රචාර ගෙන යන බව පවසන කබ්රාල් මහතා මේ නින්දිත ක්‍රියාවන්හි යෙදෙන්නන්ට එරෙහිව  නීතිමය පියවර ගන්නා බවද සඳහන් කළේය.