සියලු වෙළඳ හවුල්කරුවන් වෙත “අන්‍යෝන්‍ය තීරුබදු” අය කරන බව ඉකුත් 2වැනි දා ඇමරිකානු රජය ප්‍රකාශ කළේ ය. ඊට එරෙහිව චීනය මේ වන විට ප්‍රතිපියවර රැසක් ගෙන තිබේ. ඒ සමගම ඇමරිකාවේ කොටස් වෙළඳපොල සහ ඊට අදාළ කොටස් දර්ශක පහත වැටුණු බව වාර්තා වෙයි. ඇමරිකානු රජය සිය තීරුබදු ප්‍රතිපත්තිය වෙනස් නොකළහොත් ඇමරිකානු ආර්ථික වර්ධනය කැපී පෙනෙන පහළ යාමකට ලක්වනු ඇතැයි ආර්ථික විශේෂඥයෝ පෙන්වා දෙති.
වෙළඳ යුද්ධයකට හෝ තීරුබදු යුද්ධයකට මුලපිරුමට චීනය අකමැති වුව ද අත්‍යවශ්‍ය අවස්ථාවක එවන් යුද්ධයකට මුහුණදීමට චීනයට කිසිදු බියක් නොමැත. චීනය ඇමරිකාවට එරෙහිව තවත් 34%ක අති‍රේක තීරුබද්දක් පැනවීම ඇතුළු පියවර ඇමරිකාව දියත් කළ නව වෙළඳ යුද්ධයට ලබාදුන් නිසි ප්‍රතිචාරයකි. ආර්ථික න්‍යායන් හෝ අදාළ දත්ත සලකා බැලීමේදී තමන්ට ජාත්‍යන්තර වෙළඳාමෙන් විශාල අලාභයක් සිදු වූ බව ඇමරිකාව එකහෙළා කළ ප්‍රකාශය නිවැරදි නොවන බව පැහැදිලි ය. ඇමරිකාවට වෙළඳ හිඟයක් හිමිව ඇත්තේ විවිධ සාධකයන් මත ය. වෙළඳපොලේ ක්‍රියාකාරීත්වය, කර්මාන්තයන්හි තරගකාරීත්වය, ආර්ථික ව්‍යූහය, ජාත්‍යන්තර ශ්‍රම විභජනය, වෙළඳ ප්‍රතිපත්ති, ඇමරිකානු ඩොලරයට හිමි ස්ථානය ඇතුළු සාධක රැසක් ඊට බලපා ඇත. එ‍මෙන් ම සේවා වෙළඳාමෙහි තමන් සතු වන ප්‍රබලතාව ඇමරිකාව උවමනාවෙන් නොසලකා හැර තිබේ. එබැවින් ඇමරිකාවට ජාත්‍යන්තර වෙළඳාමෙන් ලැබී ඇත්තේ විශාල අලාභයක් නොව විශාල ලාභයක් බව කීම සාධාරණ ය.
තීරුබදු ඉහළ දැමීමෙන් ඇමරිකාවට සිය වෙළඳාමෙහි අසමබරතාව තුරන් කළ නොහැකි බවත්, එසේ තීරුබදු වැඩි කිරීමෙන් ඇමරිකානු ආර්ථික වර්ධනයට බාධා වන ගැටළු සහගත තත්ත්වයන් මතු වී තිබෙන බව ගෙවුණු වසර කිහිපයේ නිකුත් වූ දත්තවලින් ඔප්පු වී ඇත. ඇමරිකානු රජය පනවා ඇති “අන්‍යෝන්‍ය තීරුබදු”හේතුවෙන් චීන ආර්ථිකයට කෙටිකාලීන වශයෙන් අහිතකර බලපෑම් ඇති වුව ද දිගුකාලීනව එයින් චීනයට ඇතිවන බලපෑම් සීමිත ය. චීනය හා ඇමරිකාව අතර වෙළඳ ආරවුල් හටගත්තේ අද ඊයේ නොවෙයි. එම ආරවුල් හටගත් දිනයේ සිට අද දක්වා චීන ආර්ථිකයේ නම්‍යශීලිත්වය සහ පීඩනයට ඔරොත්තු දීමේ හැකියාව තවදුරටත් ශක්තිමත් වී තිබේ. එසේ ම ඇමරිකාවෙන් එල්ල වූ තීරුබදු පීඩනය සමනය කිරීම සඳහා චීනය සිය වෙළඳ හවුල්කාර කවය පුළුල් කරමින් සිටී. බිලියන 1.4ක අධික ජනගහනයක් සිටින අති දැවැන්ත වෙළඳපොලක් චීනය සතු බැවින් වෙළඳ අවදානම්වලට ඔරොත්තු දීමට චීනයට ශක්තිමත් හැකියාව පවතින බව නොරහසකි.
More Stories
TikTok තහනම් නීතිය යළිත් දින 75කින් කල් දමයි
ඇමරිකානු තීරුබදු පැනවීමට එරෙහිව චීන රජයෙන් ප්‍රතිපියවර
ඇමරිකාවේ තීරු බදු පියවර කෙරෙහි ලෝක වෙළඳ සංවිධානයේ දැඩි කනස්සල්ල