ඉන්දීය ඩෙල්ටා සැර කොරෝනා වයිරස ප්‍රභේදය ආසාදනයවූ පස් දෙනාම කොරෝනා මර්දන එන්නත ලබා ගත් අය නොවන බවට තොරතුරු හෙළිවී ඇතැයි කොළඹ නගර සභාවේ ප්‍රධාන සෞඛ්‍ය වෛද්‍ය නිලධාරී රුවන් විජයමුණි මහතා පැවැසීය .
මේ ආසාදිතයන් හමුවූ පවුලක අයකු විදේශයක සිට මෙරටට මීට සති තුනකට පෙර පැමිණ ඇති බවට හඳුනාගෙන ඇතත් ඔහුට කොරෝනා ආසාදනය වී ඇතැයි තහවුරු නොවූ බවද සෞඛ්‍ය වෛද්‍ය නිලධාරීවරයා ප්‍රකාශ කළේය .
මේ අතර ඉන්දීය ඩෙල්ටා සැර කොරෝනා වයිරස ප්‍රභේදය ආසාදනය වූ පස් දෙනාගෙන් තිදෙනෙකු මේ වනවිට සුවය ලබා සිටින බවත් අනෙක් දෙදෙනා ප්‍රතිකාර මධ්‍යස්ථානවල තවමත් සිටින බවත් සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන මහතා පැවැසීය .
මෙම ආසාදිතයන්ගේ පළමු දෙවැනි හා තෙවැනි ආශ්‍රිතයන් හඳුනාගැනීම සඳහා සෞඛ්‍ය අංශ කටයුතු කරගෙන යන බවත් ඒ සඳහා බුද්ධි අංශ නිලධාරීන්ගේද සහය ලැබෙන බවත් ඖෂධ නිෂ්පාදන, සැපයීම් හා නියාමන රාජ්‍ය අමාත්‍ය මහාචාර්ය චන්න ජයසුමන මහතා පැවැසීය .
මේ සැර කොරෝනා වයිරස ප්‍රභේදය බොහෝ දුරට විදේශයක සිට පැමිණි පුද්ගලයෙකුගෙන් මෙරටට ඇතුළු වන්නට ඇතැයි වෛද්‍ය විශේෂඥයන් සැක පළ කරන බව කී ජයසුමන මහතා වයිරසය මෙරටදී නිර්මාණය වීමට තිබෙන සම්භාවිතාව ඉතාම අඩු බවටද ඒ විශේෂඥයන් සඳහන් කරන්නේ යැයි ප්‍රකාශ කළේය.
මේ අතර මෙම සැර වයිරසය ඉන්දීය ධීවරයන් මාර්ගයෙන් මෙරටට ඇතුළු වූවා දැයි සෞඛ්‍ය අංශ වලට සැක මතු වී ඇත .
මේ හේතුව නිසා වෙරළ කලාපයේ තෝරාගත් ධීවර කණ්ඩායම් පී .සී .ආර් පරීක්ෂණවලට අහඹු ලෙස යොමුකිරීමේ වැඩපිළිවෙලක් දැනටමත් ආරම්භ කර ඇතැයි මහාචාර්ය චන්න ජයසුමන මහතා කීය .
More Stories
නව රජයේ නියෝජ්‍ය අමාත්‍යවරුන් දිවුරුම් දෙයි
උද්ධමනය පහළට
පාසල් නිවාඩුව අද සිට ඇරඹේ