කුරුණෑගල ඓතිහාසික රාජ සභා මණ්ඩපයට හානි කිරීමේ සිද්ධියට අදාළව කුරුණෑගල නගරාධිපතිවරයාට පවරා ඇති නඩුවට අදාළ ගාස්තු කුරුණෑගල මහ නගර සභාවෙන් ගෙවීමේ යෝජනාවක් ඊයේ (17 වැනිදා) අනුමත වී ඇත.
කුරුණෑගල මහ නගර සභා රැස්වීම ඊයේ (17 වැනිදා) පැවැත් වුණි. එහිදී මුදල් කමිටුව මගින් රුපියල් විස්එක් ලක්ෂ අසූදහසක මුදලක් නඩුවේ නීතිඥ ගාස්තු ලෙස ගෙවීමේ යෝජනාවක් නගරාධිපති වෙනුවෙන් උප නගරාධිපති සුමිත් උඩවාසල විසින් ඉදිරිපත් කළේය.
අදාළ යෝජනාව සම්මත කරන අවස්ථාවේදී මාධ්‍යවේදීන් සභාවෙන් ඉවත් කර නාගරික මන්ත්‍රීවරුන් එම යෝජනාව සම්මත කරගෙන ඇත. ජනතා විමුක්ති පෙරමුණ, එක්සත් ජාතික පක්ෂයේ මන්ත්‍රීවරු සහ හිටපු නගරාධිපතිවරයා යෝජනාවට විරුද්ධ වී තිබේ.
කුරුණෑගල මහ නගර සභාවේ නගරාධිපති තුෂාර සංජීව විතාරණගේ නියෝගයක් මත ඉකුත් ජූලි 14 වැනිදා කුරුණෑගල නගරය මැද පිහිටි ඉපැරැණි ගොඩනැගිල්ල ඩෝසර් කළ බවට චෝදනා එල්ල වී තිබේ.
මේ නිසා නගරාධිපතිවරයා ඇතුළු පස් දෙනකු අත්අඩංගුවට ගැනීමටද වරෙන්තු නිකුත් විය. එම වරෙන්තුව මෙම 24 වැනිදා තෙක් ක්‍රියාත්මක නොකරන ලෙස අභියාචනාධිකරණය නියෝග කරන ලදී.
More Stories
චීන මහජන සමූහාණ්ඩුව සහ ශ්‍රී ලංකා ජනරජය අතර ඒකාබද්ධ නිවේදනයක්
චීන ජාතික මහජන කොංග්‍රසයේ ස්ථාවර කමිටුවේ සභාපති සහ ශ්‍රී ලංකා ජනපති අතර හමුවක්
චීන අගමැති සහ ශ්‍රී ලංකා ජනපති අතර හමුවක්