දේශීය සහ විදේශීය සම්මානයට පාත්‍ර වූ ජ්‍යෙෂ්ඨ චිත්‍ර ශිල්පී ජයසිරි සේමගේ මහතා අභාවප්‍රාප්ත විය. ඒ මහතා අභාවප්‍රාප්ත වන විට 83 වැනි වියේ පසුවිය.
ශ්‍රී ලංකාවේ වැඩිම චිත්‍ර ප්‍රදර්ශන පැවැත්වූ චිත්‍ර ශිල්පියා ලෙස සැළකෙන සේමගේ මහතා ‘දවස’, ‘ලංකාදීප’ සහ ‘රිවිරැස’ ඇතුළු පුවත්පත් කීපයක චිත්‍ර ශිල්පියකු ලෙස ද කටයුතු කළේය.
බෞද්ධ චිත්‍ර නිර්මාණයට උපන් හපන්කම් දැක්වූ සේමගේ මහතා වෙසක් තොරණ රැසකට චිත්‍ර නිර්මාණයෙන් දායකවී ඇති අතර ඒ මහතා සිංගප්පූරුවේ සහ මැලේසියාවේ බෞද්ධ සිද්ධස්ථානවල චිත්‍ර නිර්මාණය කිරීමෙන් දායක විය.
හිටපු ජනාධිපති රණසිංහ ප්‍රේමදාස මහතා ක්‍රියාත්මක කළ ‘ගම්උදාව’ වැඩසටහනේ සෑම ගම්උදාවකම ප්‍රධාන තොරණ නිර්මාණය කිරීම ඒ මහතා වසර 10 ක පමණ කාලයක් ඉටු කළේය.
චිත්‍ර ගුරුවරයකු ද සේමගේ මහතා මියයන තෙක්ම චිත්‍ර ඇදීම පිළිබඳව උපදෙස් ලබාදුන්නේය.
අම්බලන්ගොඩ, ධර්මාශෝක විදුහලේ ආදි ශිෂ්‍යයකු වන සේමගේ මහතා සෞන්දර්ය විශ්වවිද්‍යලයේ ලලිත කළා උපාධිධාරියෙකි. ඒ මහතාගේ එකම දියණිය ඕස්ටේ්‍රලියාවේ පදිංචිව සිටින්නීය.
ජයසිරි සේමගේ මහතාගේ දේහය පිළිබඳ අවසන් කටයුතු බොරැල්ල කනත්තේදී අද (26) පස්වරුවේ සිදුකෙරිණි.
More Stories
චීන මහජන සමූහාණ්ඩුව සහ ශ්‍රී ලංකා ජනරජය අතර ඒකාබද්ධ නිවේදනයක්
චීන ජාතික මහජන කොංග්‍රසයේ ස්ථාවර කමිටුවේ සභාපති සහ ශ්‍රී ලංකා ජනපති අතර හමුවක්
චීන අගමැති සහ ශ්‍රී ලංකා ජනපති අතර හමුවක්