තලේබාන් සංවිධානය සමඟ බලය බෙදා ගැනීමට තමන් සූදානම් බව බටහිර හිතවාදී මෙන්ම බටහිර අනුග්‍රහයෙන් ද පිහිටවනු ලැබූ ඇෆ්ගන් රජය පවසා ඇතැයි ඉන්දීය පුවත් සේවා වාර්තා කරයි.
ඇෆ්ගන් රජයේ විශේෂ නියෝජිත කණ්ඩායමක් සහ තලේබාන් සංවිධානයේ දේශපාලන අංශයේ නියෝජිතයන් අතර පැවැති බවත් එම සාකච්ඡාවකින් අනතුරුව ඇෆ්ගන් රජය මෙම තීරණයට එලඹුණු බවත් ඉන්දීය පුවත් සේවා වැඩි දුරටත් වාර්තා කර තිබේ.
ඇෆ්ගන් රජයේ නියෝජිතයන් සහ තලේබාන් සංවිධානයේනියෝජිතයන් අතර සාකච්ඡා පැවැත්වීම සිදුවූයේ දෝහා කටාර් හි තලේබාන් සාම කාර්යාලය හරහාය. ඇමෙරිකාව ප්‍රමුඛ සෙසු නේටෝ හමුදා ඇෆ්ගනිස්තානයෙන් පිටවී යෑමත් සමඟ තලේබාන්වරු ඇෆ්ගනිස්තානයේ පළාත් සහ ප්‍රධාන නගර එකිනෙක අත්පත් කරමින් සිටී. මේ වනවිට හේරත් සහ ඝාස්නී ඇතුළු ප්‍රධාන නගර 10 කට වැඩි ගණනක් පවතින්නේ තලේබාන් ග්‍රහණයේය.
ඇමෙරිකාව ප්‍රමුඛ නේටෝ හමුදා ඇෆ්ගනිස්තානයෙන් පිටවී ගියේ ඇෆ්ගන් රජය සහ තලේබාන් සංවිධානය අතරේ සාම වැඩපිළිවෙළක් සකස් කර දෙමිනි. කෙසේ නමුත් තලේබාන් සන්නද්ධ අංශය එම සාම වැඩපිළිවෙළට එරෙහිව යයි. ප්‍රචණ්ඩ ක්‍රියා සිදු කරමින් ඇෆ්ගනිස්තානයේ පළාත් සහ නගර අත්පත් කර ගන්නේ ඔවුන්ය.
ඇෆ්ගනිස්තානයනේ හමුදා ඉවත් කර ගැනීම සම්බන්ධයෙන් කනගාටු නොවන බවත්, මේ මොහොතේ ඇෆ්ගන් රජය සහ ආරක්ෂක අංශ කළ යුත්තේ තලේබාන්වරුන්ගේ තර්ජනවලට මුහුණ දෙමින්, ඔවුන්ට බලය තහවුරු කර ගැනීමට ඉඩ ලබා නොදීම යැයි ඇමෙරිකන් ජනාධිපති ජෝ බයිඩන් අවධාරණය කර ඇත.
කෙසේ නමුත් ඇමෙරිකා රජය, මේ වනවිටත්, කාබුල් අගනුවර ඇමෙරිකන් තානාපති කාර්යාලයේ නිලධාරීන් ආපසු ගෙන්වා ගැනීමට හමුදාව යොදවා ඇතැවි ද විදෙස් පුවත් සේවා වාර්තා කරයි.
තලේබාන් ත්‍රස්තවාදීන්, ඇෆ්ගන් බන්ධනාගාරවලට ද පහර දෙමින් ඒවායේ සිරගත කළ ඔවුන්ගේ සාමාජිකයන් මුදා ගැනීමට පටන් ගෙන ඇතැයි ද වාර්තා වේ. ඊට අමතරව, ඇමෙරිකාව ඇතුළු නේටෝ හමුදා සාමාජිකයන්ට සහාය ලබා දුන් ඇෆ්ගන් සිවිල් වැසියන් සහ ආගමික නායකයන් සොයමින්, ඔවුන් ඝාතනය ද ආරම්භ කර තිබේ.
More Stories
චීන-බ්‍රසීල සබඳතාවන්හි ස්වර්ණමය ඇරඹුමක් සටහන් කළ චීන ජනපතිගේ බ්‍රසීල සංචාරය
වීසා රහිත ප්‍රතිපත්තිය ක්‍රියාත්මක රටවලට තවදුරටත් පහසුකම් වැඩි කිරීමට චීනයෙන් තීරණයක්
චීනයේ විදේශ වෙළඳාමේ කැපීපෙනෙන වර්ධනයක්