ප්‍රංශයේ අගමැති පුටුවට තරුණයෙක්

34 හැවිරිදි ප්‍රංශයේ අධ්‍යාපන අමාත්‍යවරයාට සිටි Gabriel Attal එරට නව අගමැති ලෙස ජනාධිපති එමානුවෙල් මැක්‍රොන් විසින් නම් කර ඇත. එය ‍ඓතිහාසික පත්වීමකි.

Gabriel Attal ප්‍රංශයේ මෙතෙක් බිහි වූ ලාබාලතම අගමැතිවරයා වන අතර ඔහු ලොව ප්‍රමුඛතම සහ බලවත් තරුණ නායකයකු බවට පත් වනු ඇත.

මැක්‍රොන්ගේ පුනරුද පක්‍ෂයේ නැගී එන තරුවක් වන Gabriel Attal ජූලි මාසයේ සිට අධ්‍යාපන හා ජාතික තරුණ අමාත්‍යවරයා ලෙස කටයුතු කර ඇත. ඔහුගේ ධූර කාලය තුළ ඔහු ප්‍රංශ රජයේ පාසල්වල අබායා පැළඳීම පිළිබඳ මතභේදාත්මක තහනමක් පැනවූ අතර පාසල්වල හිරිහැර කිරීම පිළිබඳ දැනුවත් කිරීමේ වැඩසටහන් ද ආරම්භ කර ඇත.

1984 දී ප්‍රංශුවා මිටිරන් විසින් සමාජවාදී ලෝහා ෆැබියුස් පත් කරන විට ඔහු 37 හැවිරිදි වියේ පසුවූ අතර ඒ අනුව ඔහුවද අභිබවා යමින් අතාල් එරට ඉතිහාසයේ ලාබලතම අග්‍රාමාත්‍යවරයා බවට පත්විය.

ධූරයෙන් ඉල්ලා අස් වූ එලිසබෙත් බෝර්න් වෙනුවට අතාල් පත් කර තිබේ.ඇය විසින් මාස 20ක පමණ කාලයක් අගමැති ධුරය දරනු ලැබුවාය. එම කාලය පුරාවටම ඇය පාර්ලිමේන්තුවේ බහුතරය නොමැති වීම හේතුවෙන් අරගලයක නිරත වූවාය.

ජූනි මාසයේ පැවැත්වෙන වැදගත් යුරෝපීය පාර්ලිමේන්තු මැතිවරණයට ප්‍රංශ රජය මෙහෙයවීමේ කාර්යය ඔහුට දැන් පැවරෙනු ඇත.