අධිශීතකරණවල තැන්පත් කළ යුතු ඖෂධ තොගයක් සෞඛ්‍ය අමාත්‍යාංශයේ ඖෂධ සැපයුම් අංශයේ කොරිඩෝවේ සහ සාමාන්‍ය කාමරවල ගබඩා කිරීම නිසා එම ඖෂධවල බල බිඳී ඇතැයි රජයේ ගිණුම් පිළිබඳ පාර්ලිමේන්තු කාරක සභාවට තොරතුරු අනාවරණයවී ඇත.
ඖෂධවල ක්‍රියාකාරීත්වය මෙලෙස හීනවීම නිසා රෝගියකුට එක් පෙත්තක් වෙනුවට පෙති කිහිපයක් එකවර ගැනීමට සිදුවන බව රජයේ ගිණුම් පිළිබඳ පාර්ලිමේන්තු කාරක සභාවේ (කෝපා ) සභාපති මහාචාර්ය තිස්ස විතාරණ මහතා පැවැසීය.
සෘණ ශීත තත්වයන් තුළ ගබඩා කළ යුතු ඇතැම් ඖෂධද මෙලෙස සාමාන්‍ය උෂ්ණත්වය යටතේ තිබී ඇතැයි හෙතෙම ප්‍රකාශ කළේය.
රජයේ ගිණුම් පිළිබඳ පාර්ලිමේන්තු කාරක සභාව එහි සභාපති මහාචාර්ය තිස්ස විතාරණ මහතාගේ ප්‍රධානත්වයෙන් පාර්ලිමේන්තු සංකීර්ණයේදී පෙරේදා (17) රැස්විය.
එම කාරක සභාවට පෙරේදා කැඳවා තිබුණේ සෞඛ්‍ය අමාත්‍යාංශයේ ඖෂධ සැපයුම් අංශයේ නිලධාරින්ය.
ඖෂධ වර්ග මෙලෙස අනාරක්ෂිතව ගබඩා කර තැබීම ගැන රජයේ ගිණුම් පිළිබඳ පාර්ලිමේන්තු කාරක සභාව ඖෂධ සැපයුම් අංශයේ නිලධාරීන්ගෙන් ප්‍රශ්න කර ඇත.
ශීතකරණවල හිඟය නිසා මෙම තත්වය ඇතිවූ බව එම නිලධාරීන් එහිදී ප්‍රකාශ කරන ලදැයිද මහාචාර්යවරයා ප්‍රකාශ කළේය.
වහාම එම තත්වය වැළැක්වීමට අවශ්‍ය ක්‍රියාමාර්ග ගන්නා ලෙස කෝපා කමිටු සභාපතිවරයා මෙහිදී ඖෂධ සැපයුම් අංශයේ නිලධාරීන්ට උපදෙස්දී ඇත.
මේ අතර රටට අවශ්‍ය වන්නේ අත්‍යවශ්‍ය ඖෂධ 347ක් වුවද විවිධ සමාගම් විවිධ කාණ්ඩ යටතේ ඖෂධ 20,000 ක් මෙරටට ආනයනය කරනු ලබන බව කෝපා කමිටු රැස්වීමේදී තොරතුරු අනාවරණයවී ඇත.
අවුරුද්දටම අවශ්‍ය බෙහෙත් එකවර ගැනීම සුදුසු බවත් එසේ කටයුතු නොකිරීමෙන් ඖෂධ හිඟයක් ඇති වන බවත් මහාචාර්ය තිස්ස විතාරණ මහතා කීවේය.
ඇතැම් වෛද්‍යවරුන් ඖෂධ සමාගම් සමග එකතුවී විශාල වශයෙන් මුදල් උපයන බවද හෙතෙම සඳහන් කළේය.
ඖෂධ ගෙන්වීමේදී සිදුවන අක්‍රමිකතා වැලැක්වීමට පියවර ගන්නා ලෙස කෝපා කමිටුව වෛද්‍ය සැපයුම් අංශයේ නිලධාරීන්ට උපදෙස් දුන්නේය.
More Stories
බදුල්ල – මහියංගනය මාර්ගයේ බිහිසුණු බස් අනතුරක් – දෙදෙනෙක් මරුට
ශ්‍රී ලංකාවේ ණය වැඩසටහන ගැන පැහැදිලි කිරීම
තැපැල් ඡන්ද සලකුණු කිරීම ඇරඹේ