“රොෂාන් මහානාම භාරය” ජනගතවේ (Video)

ක්‍රිකට් ක්‍රීඩාවේ ජනප්‍රිය තරුවක් මෙන්ම මානව හිතවාදියෙකු ලෙස විශාල කීර්තියක් දිනා සිටින රොෂාන් මහානාම මහතා පසුගියදා රොෂාන් මහානාම භාරය නිල වශයෙන් දියත් කළේ ය. රටේ අඩු වරප්‍රසාදලාභී දරුවන්ගේ යහපත උදාකර දීම සඳහා විවිධ පාර්ශ්වයන් සමග එක්ව කටයුතු කළ හැකි වේදිකාවක් නිර්මාණය කිරීම මෙහි අරමුණ වී ඇත. පුණ්‍ය භාරයක් ලෙස ශ්‍රී ලංකා රජයේ ලියාපදිංචි කර ඇති රොෂාන් මහානාම භාරය නිල වශයෙන් මෙරට ජනතාවට හඳුන්වා දීමේ උත්සවය, ‘Spreading Humanity Beyond Boundaries’ යන තේමාපාඨය යටතේ 2022 ඔක්තෝබර් 04 දින කොළඹදී පැවැත්විණි.

මෙම භාරයේ  ප්‍රධාන තේමාව වන ‘We Promise’ යන්න, මෙරට දරුවන්ගේ යහපත වෙනුවෙන් කැපවීම උදෙසා රොෂාන් මහානාම මහතා විසින්ම ලබාදෙන ලද ප්‍රතිඥාවකි. දරිද්‍රතාවෙන් පෙළෙන දරුවන්ට හොඳ අධ්‍යාපනයක්, නිරෝගී ජීවිතයක් සහ තම අනාගතය කැමති පරිදි හැඩගස්වා ගැනීමට අවස්ථාව ලැබෙන සුරක්ෂිත පරිසරයක් හිමි විය යුතු බව ඒ මහතා දැඩි ලෙස විශ්වාස කරයි.