කොළඹ වරායේ නැගෙනහිර පර්යන්තයෙන් 49%ක් ඉන්දියානු අදානි සමාගමට පවරාදීමේ උත්සාහය සම්බන්ධයෙන් ඉන්දියාව දිගටම බලහත්කාරී ප්‍රවේශයක් අනුගමනය කරන්නේ නම් මෙරට තුළ ඉන්දියානු නිෂ්පාදන වර්ජනය කිරීමේ රැල්ලක් ආරම්භ කරන බවට නැගෙනහිර පර්යන්තය සුරැකීමේ වෘත්තීය සමිති ව්‍යාපාරය අනතුරු හඟවයි.
නැගෙනහිර පර්යන්තයේ කොටස් අදානි සමාගමට ලබාදීමට විරෝධය පළකරමින් කොළඹ ඉන්දියානු මහකොමසාරිස් කාර්යාලයට ලිපියක් භාරදීම සඳහා ඒකාබද්ධ වෘත්තීය සමිති නියෝජිතයින් ඊයේ (21) එම මහකොමසාරිස් කාර්යාලය වෙත පැමිණි නමුත් එහි ආරක්ෂාවට සිටි පොලිස් නිලධාරීන් පැවසුවේ වෘත්තීය සමිති නියෝජිතයින් කලින් දැනුම් දී වේලාවක් වෙන්කරගෙන නොමැති නිසා ඉන්දියානු මහකොමසාරිස් කාර්යාලයේ කිසිදු නිලධාරියකු හමුවීමට ඔවුන්ට අවස්ථාව ලබාදිය නොහැකි බවයි. එසේම පවත්නා කොවිඩ් තත්වය හමුවේ එම කාර්යාල පරිශ්‍රයට බාහිර පුද්ගලයින් ඇතුළත් කරගැනීම දැඩිලෙස සීමා කර ඇති බව ද පොලිස් නිලධාරීන් විසින් ඔවුන්ට දැනුම් දෙන ලදී.
ඒ අනුව ලිපිය බාරනොදීම ආපසු හැරී පැමිණි වෘත්තීය සමිති නියෝජිතයින් මාධ්‍ය වෙත පැවසුවේ සාකච්ඡාවක් සඳහාවත් තමන්ට අවස්ථාවක් ලබා නොදෙන්නේ නම් දැඩි ක්‍රියාමාර්ගවලට යෑමට තමන්ටත් සිදුවන බවයි.
“වරාය වෘත්තීය සමිති 23ම ඒකාබද්ධ වෙලා ඉන්දියානු මහකොමසාරිස් කාර්යාලයට අපි ආවෙ අපේ යෝජනාවලිය කුමක්ද කියලා පැහැදිලි කරන්න. අපි ඇතුළ්වීමේදීම ඔවුන් කළේ අපිව ප්‍රතික්ෂේප කිරීම.
අපේ රටේම තියෙන ඉන්දියන් මහකොමසාරිස් කාර්යාලය කටයුතු කරන්නෙ මේ ආකාරයට නම් අපට අපේ රටේ ස්වාධීනත්වයක් තියෙනවාද කියලා බරපතළ ගැටළුවක් තියෙනවා.
මේ උත්තරය මත නම් මේගොල්ලන් යැපෙන්නෙ අපි ඉන්දියානු නිෂ්පාදන අපේ රටේ ප්‍රතික්ෂේප කරන වැඩපිළිවෙලකට යනවා. අපි දිනයක් ප්‍රකාශයට පත්කරනවා. ඒ දිනයේ ඉඳන් ඉන්දියානු විරෝධය අපි පටන් ගන්නවා IOC තෙල් ප්‍රතික්ෂේප කිරීමට. ඒකෙන් අපි පටන් ගන්නවා මේකට උත්තරය …” යනුවෙනුයි නැගෙනහිර පර්යන්තය සුරැකීමේ වෘත්තී සමිතියේ සම කැඳවුම්කරු සංජීව කුමාර වැලිගම මහතා පැවසුවේ.
More Stories
මහ මැතිවරණයට අදාළ තැපැල් ඡන්ද සලකුණු කිරීම අදින් අවසන්
මහ මැතිවරණයේ ප්‍රචාරණ කටයුතු අවසන් වන දිනය පිළිබඳ දැනුම්දීමක්
ආරක්ෂාව අඩුකිරීම ගැන හිටපු ජනපතිනියගෙන් මහජන ආරක්ෂක ලේකම්ට ලිපියක්