සිංහ කැන්ගරු සටනේ මෙවර ජයත් කැන්ගරුවන්ට

ශ්‍රී ලංකාව සහ ඔස්ට්‍රේලියාව අතර අද (18) පැවැත්වෙන සිව්වන විස්සයි 20 තරගයේ පළමුවෙන් පන්දුවට පහරදුන් ශ්‍රී ලංකා කණ්ඩායම නියමිත පන්දුවාර 20 අවසානයේ කඩුලු 8ක් දැවී ලකුණු 139ක් රැස් කළේය.

එම තරගයේ කාසියේ වාසිය දිනාගත් ඔස්ට්‍රේලියාව ප්‍රථමයෙන් පන්දු යැවීමට තීරණය කර තිබුණි.

ඒ අනුව තරගය ජයගැනීම සඳහා ඔස්ට්‍රේලියාවට හිමිවී ඇති ඉලක්කය ලකුණු 140කි.

පන්දු ඕවර 15.3කදී ශ්‍රී ලංකා කණ්ඩායම කඩුලු 2ක් පමණක් දැවී ලකුණු 110ක් ලබා සිටියේය.

නමුත් පන්දු ඕවර 19ක් වනවිට ශ්‍රී ලංකා කණ්ඩායමේ කඩුලු 8ක් දැවී ගොස් තිබුණේ ලකුණු 122කටය.

අවසාන පන්දු ඕවරයේදී ලකුණු 17ක් ලබාගැනීමට ජෙෆ්රි වැන්ඩසේ සහ චාමික කරුණාරත්න සමත් වූහ.

ශ්‍රී ලංකා කණ්ඩායම වෙනුවෙන් පැතුම් නිස්සංක ලකුණු 46ක් රැස්කළ අතර කුසල් මෙන්ඩිස් ලකුණු 27ක් සහ චරිත් අසලංක ලකුණු 22ක් ලකුණු පුවරුවට එක්කළහ.

පන්දු යැවීමෙන් ජයී රිචර්ඩ්සන් කඩුලු 2ක් දවාගත් අතර ඇෂ්ටන් අගාර් සිය පන්දු ඕවර 4දී ලබාදුන්නේ ලකුණු 14ක් පමණි. ඔහු එක කඩුල්ලක් දවා ගත්තේය.

තරග 5කින් සමන්විත තරගාවලියේ 3-0ක් ලෙස ඔස්ට්‍රේලියාව ඉදිරියෙන් සිටී.

තරගය පැවැත්වෙන්නේ ඔස්ට්‍රේලියාවේ මෙල්බර්න්හිදීය.