නැගෙනහිර චීන මුහුදේ මේවනවිට පවතින භූදේශපාලන තත්ත්වයට බලපෑම් කිරීමට ගන්නා ඒකපාර්ශවීය උත්සහායන්වලට විරුද්ධ වන බව ඇමෙරිකා එක්සත් ජනපදය, දකුණු කොරියාව සහ ජපානය සඳහන් කරයි.
චීනය ඉන්දු-ශාන්තිකර කලාපයට තුළ හිතුවක්කාරි ලෙස හැසිරෙන බවට ඇමෙරිකාව සහ ඇමෙරිකාවේ කලාපීය මිත්‍ර රටවල් චෝදනා කරයි. නැගෙනහිර චීන මුහුදේ භූදේශපාලනික ස්ථාවරත්වය තායිවාන සමුද්‍ර සන්ධියේ සාමයට සහ ස්ථාවරත්වයට බෙහෙවින් වැදගත් බව ඇමෙරිකාව, දකුණු කොරියාව සහ ජපානය යන රටවල් අවධාරණය කරයි.
ඇමෙරිකා එක්සත් ජනපදයේ නියෝජ්‍ය රාජ්‍ය ලේකම් ඉකුත් බදාදා ජපානයේ සංචාරයක නිරත වෙමින් ජපානයේ උප විදේශ අමාත්‍ය මොරි ටකියෝ මුණ ගැසුණේ ය. ඇමෙරිකානු නියෝජ්‍ය රාජ්‍ය ලේකම්වරයා එහිදි දකුණු කොරියාවේ පළමු උප විදේශ අමාත්‍ය චෝයි ජොන්ග් කුන් සමඟ ද සාකච්ඡා පැවැත්වීය.
ඇමෙරිකානු නියෝජ්‍ය රාජ්‍ය ලේකම් වෙන්ඩි ආර්. ෂර්මන් උප විදේශ අමාත්‍යවරුන් දෙදෙනා සමඟ වෙන වෙනම සාකච්ඡා පැවැත්වූ අතර ඔවුන් තිදෙනා එක්ව සාකච්ඡාවක් පැවැත්වූ බව ද වාර්තා විය.
දේශගුණික විපර්යාස, වසංගතයට ප්‍රතිචාර දැක්වීම සහ ආර්ථික අර්බුදවලට ප්‍රතිචාර දැක්වීම සහ සාර්ථව ආර්ථික වර්ධනය අත්පත් කරගැනීම යනාදී 21 වැනි සියවසේ ගෝලීය අර්බුදවලට විසඳුම් සෙවීමට රටවල් තුන සහයෝගයෙන් කටයුතු කරන බව ඔවුහු තිදෙනා මෙහිදි අවධාරණය කළහ.
කොරියානු අර්ධද්වීපය න්‍යෂ්ටික අවිවලින් තොර කලාපයක් බවට පත් කිරීමත් උතුරු කොරියාවේ බැලැස්ටික් මිසයිල සහ න්‍යෂ්ටික වැඩසටහන්වලින් එල්ල වන තර්ජනය සම්බන්ධයෙන් ද මෙහිදි මොවුන් තිදෙනා සාකච්ඡා කර ඇත.
නිදහස ආරක්ෂා කිරීම, ආර්ථික අවස්ථා, මානව හිමිකම් ආරක්ෂා කිරීම, සහ නීතියේ ආධිපත්‍යයට ගෞරව කිරීම යනාදි බෙදාහදාගත් වටිනාකම් මත පිහිටා ඉන්දු-ශාන්තිකර කලාපය තුළත් ලෝකය පුරාත් සාමය, ආරක්ෂාව සහ සෞභාග්‍යය ප්‍රවර්ධනය කිරීම සම්බන්ධයෙන් මෙම ඉහළ පෙළේ රාජ්‍ය තාන්ත්‍රිකයන් සාකච්ඡා පවත්වා තිබේ.
More Stories
යුරෝපා කවුන්සිලයේ සභාපතිවරයාට චීන ජනපතිගෙන් සුබ පැතුම්
ඇමරිකාවේ Los Angeles හි ලැව්ගිනි තත්ත්වයෙන් මිය ගිය අය වෙනුවෙන් චීනය සංවේගය පළ කරයි
චීන විදේශ ඇමතිවරයා ජපාන හා වියට්නාම නියෝජිතයන් පිරිසක් අතර හමුවෙයි