කාර්මික රසායනික ද්‍රව්‍ය බවට රේගුවට ප්‍රකාශ කරමින් රුපියල් දෙකෝටි විසි ලක්ෂයක් පමණ වටිනා එතනෝල් මධ්‍යසාර තොගයක් අඩංගු බහාලුමක් කොළඹ වරායට ගෙනැවිත් තිබියදී රේගු මධ්‍යම විමර්ශන අංශයේ නිලධාරීන් පිරිසක් භාරයට ගෙන විමර්ශනය කටයුතු ආරම්භ කර තිබෙනවා.
රේගු අධ්‍යක්ෂ ජනරාල් විශ්‍රාමික මේජර් ජනරාල් ජී.වී. රවිප්‍රිය මහතා සඳහන් කළේ, මෙම බහාලුම ඉකුත් 2020 වසරේ අගෝස්තු මස 09 දින කොළඹ , රාජගිරිය ප්‍රදේශයේ පිහිටි , 2016 වසරේ සිට ව්‍යාපාරික කටයුතු වලින් ඉවත් වී සිටින සමාගමක නමට සිංගප්පූරුවේ සිට කොළඹ වරායට ගෙනැවිත් ඇති බවයි.
රේගු නිලධාරීන් මෙම බහාලුම නිශ්කාශනය කර ගැනීම පිළිබඳව මෙම ආනයන සමාගම වෙත ලිපි මගින් දැනුම් දීම් සිදු කළද , ඒවාට ප්‍රතිචාර නොදැක්වීම නිසා මෙම බහාලුම විවෘත කර පරීක්ෂා කිරීමට රේගුව තීරණය කර තිබෙනවා.
මෙම බහාලුම තුළ කාර්මික රසායනික ද්‍රව්‍ය කිලෝ ග්රැම් 12,220 ක් ඇති බවට රේගුවට ප්‍රකාශ කර තිබූණ ද , මෙම බහාලුම තුළ එතනෝල් මධ්‍යසාර ලීටර් 15,200 ක් ලීටර් 200 බැගින් වූ බදුන් 76 ක් තුළ අසුරා ඇති බව රේගු නිලධාරීන් සිදු කළ රසායනාගාර පරීක්ෂණයකින් අනාවරණය කර ගෙන තිබෙනවා.
මෙම එතනෝල් තොගය කෙසේ හෝ කොළඹ වරායෙන් පිට කරගෙන ගොස් ඒවායින් මත්පැන් නිෂ්පාදනය කළහොත් සුරා බදු සහ රේගුවට ප්‍රකාශ නොකිරීම නිසා රජයට අහිමි වන මුළු බදු ආදායම රුපියල් කෝටි 06 ක් බව ද රේගු අධ්‍යක්ෂ ජනරාල්වරයා සඳහන් කළා.
ශ්‍රී ලංකාවට එතනෝල් ආනයනය කිරීම ආනයන අපනයන පාලන පනත අනුව රාජ්‍ය ප්‍රතිපත්තියක් ලෙස මෙන්ම සුරාබදු පනත යටතේ ද තහනම් කර ඇති අතර ශ්‍රී ලංකා රේගුවේ මධ්‍යම විමර්ශන ඒකකයේ නිලධාරීන් මෙම එතනෝල් අඩංගු බහාලුමේ සැබෑ හිමිකරුවන් සොයා විමර්ශන කටයුතු ආරම්භ කර තිබෙනවා.
More Stories
චීන තානාපතිවරයා හා ශ්‍රී ලංකා ජනාධිපතිවරයා අතර හමුවක්
විශ්වවිද්‍යාල අනධ්‍යයන සේවක වර්ජනය අවසන්
ජපුර විශ්වවිද්‍යාලයෙන් රුසියානු භාෂා ඩිප්ලෝමා පාඨමාලාවක්