චීනය දුෂ්කරතාවයට පත් අවස්ථාවේ ශ්‍රී ලංකාව චීනයට උදව් කළ නිසා ශ්‍රී ලංකාවට උදව් කරන්න චීනයට දැන් අවස්ථාව උදා වී ඇති බව චීනයේ විදේශ කටයුතු අමාත්‍යාංශය කියයි
චීනය දුෂ්කරතාවයකට පත්වූ අවස්ථාවේ දී ශ්‍රී ලංකාව චීනයට සහාය ලබා දුන් බවත්, දැන් ශ්‍රී ලංකාවේ කොවිඩ්-19 වසංගතය තුළ ශ්‍රී ලංකාවේ ආර්ථික අභියෝග ජය ගැනීමට උපකාර කීරීමට චීනයට අවස්ථාව පැමිණ ඇති බවත් චීනයේ විදේශ කටයුතු අමාත්‍යාංශයේ විශේෂ උපදේශක තානාපති ෂා ෂුකාංග් මහතා සඳහන් කළේය. චීනයේ ශ්‍රී ලංකා තානාපති ආචාර්ය පාලිත කොහොන මහතාගේ මෙහෙයවීමෙන් සංවිධානය කර තිබූ සිංහල හා දෙමළ අලුත් අවුරුදු උත්සවයකට සමගාමීව පැවැති ආයෝජන හා සංචාරක ප්‍රවර්ධන වැඩසටහනකට සහභාගි වී හෙතෙම මේ බව සඳහන් කෙළේය.
ඉකුත් 14 වනදා පැවැති මෙම උත්සවය හා වැඩසටහන මඟින්, ආසියාවේ සැබවින්ම ආශ්චර්යමත් ගමනාන්තයක් වන ඉන්දියන් සාගරයේ පිහිටි ශ්‍රී ලංකාවේ උත්කෘෂ්ඨත්වය විශ්වසනීය ලෙස ඉස්මතු කරන ලද අතර, ශ්‍රී ලංකාවේ සංස්කෘතියේ, උරුමයන් සහ ආහාර පානවල සාරවත් සංකලනයන්ද ඉස්මතු වී පෙනෙන්නට තිබිණ.
ශ්‍රී ලංකා තානාපති කාර්යාලයේ මූලිකත්වයෙන්, ශ්‍රී ලංකා වාණිජ දෙපාර්තමේන්තුවේ ද සහය ඇතිව සංවිධානය කරන ලද මෙම වැඩසටහන සඳහා විශේෂ අමුත්තන් 175 දෙනෙකුට අධික පිරිසක් සහභාගී වූහ. චීනයේ විදේශ කටයුතු අමාත්‍යාංශයේ, ආසියානු කටයුතු දෙපාර්තමේන්තුවේ නියෝජ්‍ය අධ්‍යක්ෂ ජනරාල් චෙන් සොං මහතා සහ විශේෂ උපදේශක තානාපති ෂා ෂුකාංග් මැතිතුමා චීන රජය නියෝජනය කරමින් මෙම අවස්ථාව සඳහා එක් වූහ. මෙම අවස්ථාවට විදේශ කටයුතු අමාත්‍යාංශයේ අනෙකුත් නියෝජිතවරුන්, වාණිජ කටයුතු අමාත්‍යාංශය, රාජ්‍ය ව්‍යවසායවල සභාපතිවරුන් සහ නියෝජිතවරුන්, පෞද්ගලික සමාගම්, සංචාරක ක්‍රියාකරුවන් සහ නියෝජිතවරුන්, වාණිජ මණ්ඩල සාමාජිකයින් සහ මාධ්‍යවේදීන් ද සහභාගී වූහ.
තානාපති ආචාර්ය පාලිත කොහොන මැතිතුමා වෙළඳාම සඳහා, අනාගත ආයෝජකයින් සඳහා සහ අධ්‍යාපන හා සංස්කෘතික හුවමාරුව සඳහා ශ්‍රී ලංකාවේ පවතින අවස්ථා විස්තර කරමින් සිත් ඇදගන්නාසුළු දේශනයක් පැවැත්වීය. සංචාරක කටයුතු ක්ෂේත්රයේ පවතින අවස්ථා පිළිබඳව එතුමා විස්තරාත්මකව ඉස්මතු කළේය. චීනයේ සංචාරක සීමාවන් ලිහිල් කිරීමත් සමඟ, දැන් ඉහළ ඉල්ලුමක් පවතින සංචාරක ගමනාන්තයක් වන ශ්‍රී ලංකාව නැරඹීම සඳහා පැමිණීමට වැඩි චීන සංචාරකයින් ප්‍රමාණයක් උනන්දු කරවනු ඇත. චීන සංචාරකයින් සඳහා වඩාත් සුදුසු ගමනාන්තයක් ලෙස ශ්‍රී ලංකාව ප්‍රවර්ධනය කිරීමේ අරමුණින් යුතුව සංචාරක ක්‍රියාකරුවන් සමඟ සාකච්ඡා පවත්වමින් සිටින බව තානාපතිවරයා වැඩිදුරටත් පැවසීය.
සහස්‍ර කිහිපයකට පෙර ආරම්භ වූ සමුද්‍ර සේද මාවත හරහා පැවති වෙළඳ ඉතිහාසය සිහිපත් කරමින්, අද පවතින නවීන තාක්‍ෂණය හා ප්‍රවාහනයේ දියුණුවත් සමඟ දෙරට අතර වෙළඳාම තවදුරටත් දියුණු කළ හැකි බව ආචාර්ය කොහොන මැතිතුමා පැවසීය. විශේෂයෙන්, ශ්‍රී ලංකාවට දැන් සහ තවත් බොහෝ දේ අපනයනය කිරීමට හැකි විය යුතු වන අතර, පවත්නා වෙළඳ පරතරය අඩු කිරීමේ අරමුණින් යුතුව ශ්‍රී ලංකාව පුළුල් පරාසයක භාණ්ඩ කෙරෙහි අවධානය යොමු කළ යුතුය. ශ්‍රී ලංකාවේ අපනයන ඒවායෙහි ස්ථානගත කිරීම සඳහා තානාපති කාර්යාලය ප්‍රමුඛ පෙළේ ඊ-වාණිජ්‍ය වේදිකා කිහිපයක් සමඟ සාකච්ඡා කරමින් පැවතියේය. තවද, දැවැන්ත බයිරොන්ග් තොග වෙළඳපොලේ ශ්‍රී ලංකා ජාතික මණ්ඩපයක් නිර්මාණය කිරීම සඳහා හෙනාන් හි රජය ඉදිරිපත් විය. දැනට ශ්‍රී ලංකාවේ ඇතැම් නිෂ්පාදන කෙරෙහි බලපාන තීරුබදු නොවන බාධක ඉවත් කිරීම සඳහා දූත මණ්ඩලය කටයුතු කරමින් සිටින බව තානාපතිවරයා පැහැදිලි කළේය. මේ සඳහා ඔහු දරන ප්‍රයත්නයට සහාය දෙන ලෙස එතුමා චීන වාණිජ මණ්ඩලයෙන් ඉල්ලා සිටියේය. නිදහස් වෙළඳ ගිවිසුමක් ලාභදායී චීන වෙළෙඳපොළට වැඩි ශ්‍රී ලාංකික නිෂ්පාදන ප්‍රමාණයක් ඇතුළත් කිරීමට පහසුකම් සැලසීම සඳහා තවත් ක්‍රමයක් වනු ඇතැයි එතුමා අදහස් කළේය. මෙම නිදහස් වෙළඳ ගිවිසුමක් පිළිබඳ සාකච්ඡා ඉක්මනින් නැවත ආරම්භ වනු ඇතැයි එතුමා අපේක්ෂාව පළ කළේය.
කොළඹ වරාය නගරය, හම්බන්තොට කාර්මික කලාපය සහ එරාවූර් හි රෙදිපිළි උද්‍යානය සඳහා ලොව පුරා ආයෝජකයින් ආකර්ෂණය කර ගැනීමට ශ්‍රී ලංකාව යෝජනා කරයි. විශේෂයෙන් බදු සහන ඇතුළු ආකර්ශනීය සහන සමඟ ශ්‍රී ලංකාවේ මෙම ස්ථානවල විවෘත වී ඇති අවස්ථාවලින් ප්‍රයෝජන ගන්නා ලෙස ආචාර්ය කොහොන මැතිතුමා චීන ආයෝජකයින්ට ආරාධනා කළේය.
නව ජනාධිපතිවරයා සහ නව රජය බලයට පත්වීමත් සමඟ දේශපාලන ස්ථාවරත්වය ශ්‍රී ලංකාව තුළ නැවත ස්ථාපිත කර ඇති බව එතුමා වැඩිදුරටත් පැවසීය. ප්‍රායෝගික ප්‍රවේශයන් සමඟ ප්‍රගතිශීලී ප්‍රතිපත්ති හඳුන්වා දී ඇති අතර, ඒවා අවම වශයෙන් ඉදිරි වසර පහ සඳහා නොවෙනස්ව පවතිනු ඇත. 2030 වන විට ශ්‍රී ලංකාව සිය බලශක්ති අවශ්‍යතාවයන්ගෙන් 70% ක් පුනර්ජනනීය බලශක්තියෙන් නිපදවනු ඇති අතර, එමඟින් තවදුරටත් ආයෝජන අවස්ථා බිහිවනු ඇත. ශ්‍රී ලංකාව දක්ෂිණ සේද මාවත මධ්‍යයේ පිහිටා ඇති අතර, හවුල් සමෘද්ධියක් සහිත කලාපයක් පිළිබඳ අභිලාෂයන් සහිතව තීරය හා මාර්ගය සංකල්පයෙහි වැදගත් කේන්ද්‍රස්ථානයක් විය. එහි භූගෝලීය පිහිටීම නිසා ඉන්දියන් සාගර කලාපයේ වඩාත් ක්‍රියාකාරී ආර්ථිකයන් කිහිපයක් කරා පහසුවෙන් ප්‍රවේශ වීමට ඊට හැකිය. මෙම හැකියාවන් පිළිබඳව සලකා බලන ලෙස එතුමා චීන ආයෝජකයින්ට ආරාධනා කළේය. ආචාර්ය කොහොන මැතිතුමා ශ්‍රී ලංකාවේ අධ්‍යාපන ක්ෂේත්රයේ අවස්ථා පිළිබඳව ද කතා කළේය. ගෝලීය වශයෙන් පිළිගත් අධ්‍යාපන ආයතනවල කලාපීය පහසුකම් ශ්‍රී ලංකාවේ පිහිටුවීම ශ්‍රී ලංකාව විසින් දිරිමත් කොට ඇත.
චීනය බහුපාර්ශ්වික හා කලාපීය වේදිකාවල දී අඛණ්ඩ දේශපාලන සහයෝගය ලබා දීම පිළිබඳව සහ ආර්ථික වශයෙන් සංවර්ධනය කිරීම සඳහා ශ්‍රී ලංකාවේ ප්‍රයත්නවලට සහය වීම පිළිබඳව එතුමා සියස්තූතිය පුද කළේය.
තානාපතිවරයා පළකළ හැඟීම් අනුමත කරමින්, චීනයේ විදේශ කටයුතු අමාත්‍යාංශයේ ආසියානු කටයුතු දෙපාර්තමේන්තුවේ නියෝජ්‍ය අධ්‍යක්ෂ ජනරාල් චෙන් සොන්ග් මහතා, චීනය ශ්‍රී ලංකාවේ සැබෑ මිතුරෙකු බවත්, එහි සංවර්ධන ප්‍රයත්නවලට සහ කලාපීය සහ ජාත්‍යන්තර වේදිකාවල දී සහාය දැක්වීමට සැමවිටම සූදානම් බවත් පැවසීය. චීන ජනාධිපතිවරයා වෙත අක්තපත්‍ර පිළිගැන්වීම පිළිබඳව තානාපතිවරයාට සුබ පැතූ ඔහු, ශ්‍රී ලංකාවේ ජාතික අලුත් අවුරුද්ද වෙනුවෙන් ද සුබ පැතුම් එක් කළේය. ආයෝජන සඳහා වඩාත් සුදුසු ගමනාන්තයක් ලෙස ශ්‍රී ලංකාව සලකන ලෙස ඔහු චීන සමාගම්වලින් ඉල්ලා සිටියේය.
චීනයේ ප්‍රධාන ආර්ථික හවුල්කරුවෙකු ලෙස ශ්‍රී ලංකාව ප්‍රවර්ධනය කිරීම සහ වෙළඳ හා ආයෝජන සඳහා ගමනාන්තයක් ලෙස ඇයගේ ශක්තීන් කෙරෙහි අවධානය යොමු කිරීම යන තේමාව ඔස්සේ තානාපති කාර්යාලය දීප්තිමත් ලෙස සරසා තිබුණි. වෙළඳ කුටි මඟින් විවිධ රසයන් සහිත ලංකා තේ, හස්ත කර්මාන්ත, මැණික් හා ස්වර්ණාභරණ, රසකැවිලි සහ කුළුබඩු වැනි ශ්‍රී ලංකාවේ ප්‍රධාන අපනයන භාණ්ඩ ප්‍රදර්ශනය කරන ලදී. කිතුල් නිෂ්පාදන චීනයට හඳුන්වා දීම එහි විශේෂත්වයක් විය. ‘ශ්‍රී ලංකාවේ නිෂ්පාදන’ කුටිය මෙම උත්සවයේ ප්‍රධාන ආකර්ෂණයක් විය. මෙම අවස්ථාවේ දී ප්‍රදර්ශනය කරන ලද මැණික් ගල්, රතු කැට සහ නිල් මැණික් ආගන්තුකයන්ගේ සැලකිය යුතු අවධානයක් දිනා ගත්තේය.
දෙරටේ ජනතාව අතර අන්‍යෝන්‍ය අවබෝධය සහ සුහදතාවය වැඩි දියුණු කිරීම සඳහා ධනාත්මක වාතාවරණයක් නිර්මාණය කිරීමට අමතරව, ශ්‍රී ලංකාව සහ චීනය අතර ද්විපාර්ශ්වික මිත්‍ර සබඳතාවලට ධනාත්මක ශක්තියක් ලබා දීම සඳහා ද මෙම සන්ධ්‍යාව අවස්ථාවක් විය.
සියලුම අමුත්තන්ට රසවත් ශ්‍රී ලාංකික රාත්‍රී භෝජන සංග්‍රහයකින් සංග්‍රහ කරන ලද අතර, තරුණ ඔපෙරා ගායකයින් තිදෙනෙකුගේ අපූරු ගායනා සමඟ ලෝක මට්ටමේ සංගීත වාද්‍ය වෘන්දයක් ද ඉදිරිපත් කරන ලදී.
ශ්‍රී ලංකා තානාපති කාර්යාලය
බීජිං
2021 අප්‍රේල් 20 වැනි දින
More Stories
බදුල්ල – මහියංගනය මාර්ගයේ බිහිසුණු බස් අනතුරක් – දෙදෙනෙක් මරුට
ශ්‍රී ලංකාවේ ණය වැඩසටහන ගැන පැහැදිලි කිරීම
තැපැල් ඡන්ද සලකුණු කිරීම ඇරඹේ