අලුත් අවුරුදු කොවිඩ් පොකුර මතු වීමෙන් පසු එම රෝගීන් සංඛ්‍යාව ඉහළ යෑම නිසා බොහෝ රෝහල් හා ප්‍රතිකාර මධ්‍යස්ථාන වල ඇඳන් සම්පූර්ණයෙන්ම පාහේ පිරී ගොස් ඇතැයි රෝහල් ආරංචිමාර්ග වලින් පැවසේ .
කොවිඩ් රෝගීන්ට ප්‍රතිකාර ලබාදෙන මධ්‍යම පළාතේ රෝහල් පහේ ඇඳන් 1200ම මේ වෙනවිට පිරී ගොස් ඇතැයි මධ්‍යම පළාත් සෞඛ්‍ය සේවා අධ්‍යක්ෂ වෛද්‍ය නිහාල් වීරසූරිය මහතා පැවසීය .
කොවිඩ් රෝගීන්ට ප්‍රතිකාර ලබාදීම සඳහා පළාතේ තවත් රෝහල් එකොළහක් සූදානම් කරගෙන යන බවත් දැනටමත් රෝහල් දෙකක් සූදානම් කර අවසන් බවත් පළාත් සෞඛ්‍ය සේවා අධ්‍යක්ෂවරයා කීය .
මධ්‍යම පළාතේ සෑම දිස්ත්‍රික්කයකම අලුතින් ඇඳන් දාහක් සූදානම් කරගෙන යන බවද නිහාල් වීරසූරිය මහතා පැවසුවේය .
මේ අතර මධ්‍යම පළාතෙන් පෙරේදා( 1)වනවිට කොවිඩ් ආසාදිතයන් නම දහස් හාරසිය හැටක් වාර්තා වී ඇත .
කොවිඩ් වැළඳීමෙන් මධ්‍යම පළාතේ මියගොස් ඇති සංඛ්‍යාව 95කි.
මේ අතර කොවිඩ් රෝගීන් ඉහළ යෑම නිසා අංගොඩ බෝවන රෝග විද්‍යායතනද රෝගීන්ගෙන් පිරී ඇතැයි එහි අධ්‍යක්ෂ වෛද්‍ය හසිත අත්තනායක මහතා පැවසීය .
කෙසේ වෙතත් අලුතින් රෝගීන් භාරගැනීමට කිසිදු බාධාවක් නැතැයි ද ඔහු කීය .
කෑගල්ල දිස්ත්‍රික්කයේ රෝගීන්ට ප්‍රතිකාර ලබා දෙන රෝහල්වල සියලු ඇඳන් මේ වන විට පිරි ගොස් ඇතැයි කෑගල්ල සෞඛ්‍ය සේවා අධ්‍යක්ෂ විසේසඥ වෛද්‍ය කුමාර් වික්‍රමසිංහ මහතා පැවසීය .
කොවිඩ් ආසාදිතයන් හතළිස් දෙනකු නිවෙස්වල පසුවන බවත් ඔවුන්ට ද රෝහල් පහසුකම් සපයාදීමට කටයුතු කරගෙන යන බවත් සෞඛ්‍ය සේවා අධ්‍යක්ෂවරයා කීය .
උඳුගොඩ රෝහලේ රෝගීන් එකසිය තිස් දෙනෙකු ද රඹුක්කන රෝහලේ රෝගීන් අසූ දෙනකු ද බෙලිගල රෝහලේ රෝගීන් හැත්තෑ දෙනකු ද වරකාපොල රෝහලේ රෝගීන් දෙසිය පනස් දෙනෙකු ද පින්නවල රෝහලේ තුන්සිය තිස් දෙනකු ද කිතුල්ගල රෝහලේ එකසිය හතළිස් දෙනෙකුද දැනට ප්‍රතිකාර ලබන බව වික්‍රමසිංහ මහතා කීය.
More Stories
මහ මැතිවරණයේ තැපැල් ඡන්ද සලකුණු කිරීමේ තෙවන දිනය අදයි
බදුල්ල – මහියංගනය මාර්ගයේ බිහිසුණු බස් අනතුරක් – දෙදෙනෙක් මරුට
ශ්‍රී ලංකාවේ ණය වැඩසටහන ගැන පැහැදිලි කිරීම