ඊසාන දිග බෙංගාල බොක්ක ආශ්‍රිතව වායුගෝලයේ පවතින කැළඹිලි ස්වභාවය මැයි 24 වනදා වනවිට සුළි කුණාටුවක් දක්වා වර්ධනය විය හැකි බව කාලගුණ විද්‍යා දෙපාර්තමේන්තුවේ අධ්‍යක්ෂ ජනරාල් අතුල කරුණානායක මහතා පවසයි.
“මේ වායුගෝලයේ කැළඹෙන ස්වභාවය 22 වෙනිදා වෙනකොට අඩුපීඩන කලාපයක් බවට පත්වෙන ලකුණු අපට පැහැදිලි වෙලා තියෙනවා. ඊට අමතරව 23 වෙනි දින මේක පීඩන අවපාතයක් වෙලා 24 වෙනිදා වෙනකොට සුළි කුණාටුවක් බවට පත්වෙන ලකුණු තමයි අපේ විශ්ලේෂණවල තියෙන්නෙ. නමුත් මේකෙ වක්‍ර බලපෑමක් තමයි දිවයින තුළට තියෙන්නෙ, මේකෙ සෘජු බලපෑම තියෙන්නෙ ඉන්දියාවට. 26 වෙනි දින මෙය ඉන්දියාව තුළට ඇතුළුවෙන ලකුණු තමයි තියෙන්නෙ.
මේ හේතුව නිසා කඩින් කඩ වැසි සහ සුළඟේ වේගය වැඩිවෙන අවස්ථා තියෙනවා. ඉතිං ඒක නිසා අපි ධීවර හා නාවික ප්‍රජාවට කියනවා එම මුහුදු සීමාව තුළ ධීවර හා නාවික කටයුතුවල යෙදෙන්න එපා කියන එක. එතකොට මේ තත්වය නිරන්තරයෙන් දිවයිනේ නිරිත දිග කොටසේ 24,25,26 වැනි දිනවල වැසි තත්වයන් වැඩිවීමේ ලකුණු දැනට පහළවෙලා තියෙනවා. විශේෂයෙන් එක දිගට වර්ෂාව ආවොත් සමහරවිට ගංවතුර උවදුරු, ඊට අමතරව කඳු කඩාවැටීම් වගේ සංසිද්ධි ඇතිවෙන්නත් හැකියාවක් තියෙනවා, විශේෂයෙන්ම අපි දන්නවා ගාල්ල, රත්නපුර, කලුතර වගේ පළාත්වල” යනුවෙනුයි ඒ මහතා සඳහන් කළේ.
කාලගුණ විද්‍යා දෙපාර්තමේන්තුවේ අධ්‍යක්ෂ ජනරාල් අතුල කරුණානායක මහතා මේ බව පැවසුවේ ඊයේ (21) පස්වරුවේදී මාධ්‍ය වෙත අදහස් දක්වමිනි.
More Stories
බදුල්ල – මහියංගනය මාර්ගයේ බිහිසුණු බස් අනතුරක් – දෙදෙනෙක් මරුට
ශ්‍රී ලංකාවේ ණය වැඩසටහන ගැන පැහැදිලි කිරීම
තැපැල් ඡන්ද සලකුණු කිරීම ඇරඹේ