බෙයිජීං ආරක්ෂාව තර කෙරේ

නව කොරෝනා වයිරසයේ නව ප්‍රභේදයක් වන ඩෙල්ටා ප්‍රභේදය පැතිර යෑම හේතුවෙන් බීජිං අගනුවර ආරක්ෂාව වැඩි කිරීමට චීනය පියවර ගෙන ඇත.

චීනයේ නගර කිහිපයකින්ම මේ වනවිට ඩෙල්ටා ප්‍රභේදය ආසාදනය වූ පුද්ගලයන් හඳුනාගෙන ඇති අතර ඒ හේතුවෙන් චීනය මෙලෙස දැඩි ක්‍රියාමාර්ග ගැනීමට පියවර‌ ගෙන ඇත.

බීජිං අගනුවරට පැමිණීමට අපේක්ෂා කරන එහෙත් ඉහළ අවදානමක් සිටින පිරිස් ඔවුන්ගේ සැලසුම් ප්‍රමාද කළ යුතු බවත් බීජිං නුවර ජීවත්වන එහෙත් මේ වනවිට වෙනත් අවදානම ඉහළ නගරයක සිටින යමකු නැවත පැමිණීමට අපේක්ෂා කරන්නේ ඔවුන් ද ප්‍රමාද වී පැමිණිය යුතු බව චීනයේ ජාතික සෞඛ්‍ය කොමිසම දන්වා ඇත.

එසේ නමුත් එසේ පැමිණීම අත්‍යවශ්‍ය නම් ඔවුන් පී.සී.ආර්. පරීක්ෂණයකට යොමු විය යුතු අතර එහි ප්‍රතිඵල අනුව ඔවුන්ගේ පැමිණීම තීරණය වන බවත් වයිරසය ආසාදනය වී ඇතිනම් ඔවුන්ට නගරයට පැමිණීමට නොහැකි බවත් එම කොමිසම අවධාරණය කර ඇත.

දුම්රිය මාර්ග, මහාමාර්ග සහ ගුවන් තොටුපොළවල ද වසංගතය පැතිර යෑම වැළැක්වීම සඳහා දැඩි පියවර ගැනීමට චීනය පියවර ගෙන ඇත.