සිංහරාජයේ සතුන් එකතු කළ විදේශයෙක්

සිංහරාජ වනාන්තරයෙන් කටුස්සන්, දිමියන්, කුහුඹුවන්, කලාඳුරුවන් ඇතුලු කෘමින් එකතුකළ  ජර්මන් ජාතික අයියා මලෝ දෙදෙනා අප්‍රේල් මස 08දා තෙක් රක්‍ෂිත බන්‍ධනාගාරයේ තබන ලෙස මොරවක මහේස්ත්‍රාත් අජිත් ලියනගේ මහ තානියෝග කළේය.

වනජීවී දෙපාර්තමේන්තුවේ නිලධාරීන් විසින් සැකකරුවන් දෙදෙනා අධිකරණයට ඉදිරිපත් කරනු ලැබීය. මෙසේ රිමාන්ඩ්භාරයට පත්කෙරුණේ ජර්මනියේ Hannover  හි Klumpp Daniel (52) සහ ඔහුගේ සහෝදරයා වන Klumpp Lars (47) යන ජර්මන් ජාතිකයන් දෙදෙනායි. ඔවුන් මාර්තු මස 17 දින ලංකාවට පැමිණ ඇති බවද අධිකරණයේ දී අනාවරණය විය.

සැකකරුවන් දෙදෙනා සිංහරාජ වාන්නතරය නැරඹීමට පැමිණ ඇත්තේ 27දාය. එසේ පැමිණ සිංහරාජ වනාන්තරයට අයත් දෙණියාය කුරුලුගල ප්‍රදේශයේ සංචාරය කර ඇත්තේ වනසංරක්‍ෂණ දෙපාර්තමේන්තුවේ අනුමත මාර්ගෝපදේශකයෙකු සමගය.

කැලෑවේ සංචාරය කරද්දී එක් සංචාරකයෙක් කැලෑවේ සිටි කටුස්සෙක් ඔහුගේ ගමන් මල්ලට දාගන්නා ආකාරය සංචාරක මගපෙන්වන්නා දැක තිබේ. ඔහු ඒ බව සිංහරාජ හරිත මිතුරෝ සංවිධානයට දන්වා තිබේ.

ඔවුන් විසින් වනජීවී දෙපාර්තමේන්තුවට දැනුම් දීමෙන් පසු වනජිවී දෙපාර්තමේන්තුවේ දකුණු පළාත්භාර සහකාර අධ්‍යක්‍ෂ චන්න සුරවීර මහතාගේ උපදෙස් මත සිංහරාජ වනජිවී අඩවි කාර්යාලයේ නිලධාරීන් පිරිසක් සහ ප්‍රදේශය අයත් මිරිස්ස වනජීවී අඩවි කාර්යාලයේ නිලධාරී පිරිසක් සැකකරුවන් අත්අඩංගුවට ගැනීමට යවා තිබුණි.