ආයතන 13ක ප්‍රධානීහු ලබන සතියේ කෝපා කමිටුවට

ලංකා විදුලිබල මණ්ඩලය සහ නාගරික සංවර්ධන අධිකාරිය ඇතුළු ආයතන 13 ක ප්‍රධානීහු  පොදු ව්‍යාපාර  පිළිබඳ පාර්ලිමේන්තු කාරක සභාව( කෝප් කමිටුව )සහ රජයේ ගිණුම් පිළිබඳ පාර්ලිමේන්තු කාරක සභාව (කෝපා කමිටුව) හමුවට ලබන සතියේ කැදවෙති.

ආයතන 3ක ප්‍රධානීන්   කෝප් කමිටුව හමුවටද ආයතනය 11ක ප්‍රධානීන්  කෝපා කමිටුව හමුවටද මෙසේ  කැදවෙන බව පාර්ලිමේන්තු මහලේකම් ධම්මික දසනායක මහතා පැවසීය.

කෝප් කමිටුව හමුවට කැදවෙන ආයතන තුන වන්නේ ලංකා විදුලිබල මණ්ඩලය, නාගරික සංවර්ධන අධිකාරිය සහ මොරටුව විශ්ව විද්‍යාලයයි.

නාගරික සංවර්ධන අධිකාරිය කෝප් කමිටුව හමුවට  ලබන 7  වෙනිදාද මොරටුව විශ්ව  විද්‍යාලය ලබන 8 වෙනිදාද   විදුලිබල මණ්ඩලය ලබන 9 වැනිදාද කැදවෙන බව  පාර්ලිමේන්තු සන්නිවේදන අංශය පවසයි.

මෙම රැස්වීම් කෝප් කමිටුවේ සභාපති මහාචාර්ය චරිත හේරත් මහතාගේ ප්‍රධානත්වයෙන් පැවැත්වීමට  නියමිතය.

රජයේ ගිණුම් පිළිබඳ පාර්ලිමේන්තු කාරක සභාවට( කෝපා කමිටුව) ලබන සතියේ කැද වෙන ආයතන සංඛ්‍යාව 10කි.

මේ අනුව කෘෂිකර්ම අමාත්‍යාංශය ලබන 7 වැනිදාද  ආනයන අපනයන පාලන දෙපාර්තමේන්තුව ලබන 8 වෙනිදාද  ධීවර අමාත්‍යාංශය ලබන නව වැනිදාද  වෙළඳ, වාණිජ හා ආහාර සුරක්ෂිතතා අමාත්‍යාංශය, ආහාර කොමසාරිස් දෙපාර්තමේන්තුව, සමූපකාර සංවර්ධන දෙපාර්තමේන්තුව, සතොස ආයතනය, පාරිභෝගික කටයුතු පිළිබඳ අධිකාරිය, ජාතික සමූපකාර සංවර්ධන ආයතනය, රාජ්‍ය වාණිජ (විවිධ) නීතිගත සංස්ථාව යන ආයතන ලබන10 වැනිදාද  කෝපා  කමිටුව හමුවට කැඳවේ.

වෙළෙඳ වාණිජ හා ආහාර සුරක්ෂිතතා අමාත්‍යාංශය සහ ආහාර කොමසාරිස් දෙපාර්තමේන්තුව  ඇතුළු ආයතන කෝපා  කමිටුව හමුවට මෙසේ  කැඳවන්නේ රටේ ආහාර ප්‍රශ්නය සම්බන්ධයෙන් සාකච්ඡා කිරීම සඳහාය.

රජයේ ගිණුම් පිළිබඳ පාර්ලිමේන්තු කාරක සභාව එහි සභාපති මහාචාර්ය තිස්ස විතාරණ මහතාගේ ප්‍රධානත්වයෙන්  රැස්වීමට නියමිතය.