ශ්‍රී ලංකාවේ ප්‍රාථමික අධ්‍යාපනය සංවර්ධනය කිරීම වෙනුවෙන් වන ඉදිරි ක්‍රියාමාර්ග සඳහා යුනිසෙෆ් ආයතනයේ ඉදිරි දායකත්වය සම්බන්ධයෙන් සාකච්ඡාවක් අද (07) අධ්‍යාපන අමාත්‍ය, මහාචාර්ය ජී එල් පීරිස් මහතා සහ යුනිසෙෆ් ආයතනයේ නියෝජිතවරුන් අතර පැවැත්වුණා.
ප්‍රාථමික අධ්‍යාපනයේ ගුණාත්මකභාවය ඉහළ නැංවීම හා පූර්ව ළමාවිය ඇතුළු ප්‍රාථමික අධ්‍යාපන අදියරයන්හි සිදුකළ යුතු යැයි අපේක්ෂා කරන සියලු යෝජනා සහ නිර්දේශ ඉදිරියේ දී අධ්‍යාපන අමාත්‍යාංශය වෙත ලබාදීමට ද මෙහි දී යුනිසෙෆ් ආයතනය එකඟතාව පළ කළේය.
එමෙන් ම නුදුරේ දී ක්‍රියාවට නංවන අධ්‍යාපන ප්‍රතිසංස්කරණ තුළ ප්‍රාථමික අධ්‍යාපන ප්‍රතිසංස්කරණයට අදාළ ක්‍රියාමාර්ග සඳහා යුනිසෙෆ් ආයතනයේ සහාය අපේක්ෂා කරන බවත්, සියලු සැලසුම් ක්‍රියාවට නැංවීමේ දී ග්‍රාමීය මට්ටමේ සිට ජාතික මට්ටම දක්වා පූර්ණ අවධානය යොමු කරමින් සියලු පාර්ශවයන්හි අදහස්වලට ඉඩ ලබාදෙමින් කටයුතු කරන බව ද අධ්‍යාපන අමාත්‍යවරයා වැඩිදුරටත් ප්‍රකාශ කළේය.
යුනිසෙෆ් ශ්‍රී ලංකා ප්‍රධාන නියෝජිත ටිම් සටන් (Tim Sutton) , අධ්‍යාපන ප්‍රධානී යෂින්කා ජයසිංහ, යුනිසෙෆ් නියෝජිත ටකහෝ ෆුකාමි (Takaho Fukami) යන මහත්ම මහත්මීන් ඇතුළු පිරිසක් මෙම අවස්ථාවට එක්ව සිටියහ.
More Stories
බදුල්ල – මහියංගනය මාර්ගයේ බිහිසුණු බස් අනතුරක් – දෙදෙනෙක් මරුට
ශ්‍රී ලංකාවේ ණය වැඩසටහන ගැන පැහැදිලි කිරීම
තැපැල් ඡන්ද සලකුණු කිරීම ඇරඹේ